Cantau a sa moda ceraxina
Cantau a sa moda ceraxina
"Feimi dignu de "os" alabai o Virgini Santissima e donaimi forza contra is nemigus bostus."
Ceraxius,MMXIX
Confraternita della Vergine Santissima del Rosario
Chiesa di San Giuliano
-Selargius-
SU SANTU ROSARIU
Cantau a sa moda ceraxina
In nomini de su Babbu, de su Fillu e de su Spiritu Santu.
Alabanzias
(Si cantant innantis de proclamai su misteriu,una borta candu est arresau, duas bortas candu est cantau)
Alabau sempiri siat, su nomini de Gesus de Giuseppi e de Maria
Alabeus prus e prus,su nomini de Maria de Giuseppi e de Gesus
Pustis hai Cantau is alabanzias si proclamant is Misterius e si cantat:
SU BABBU NOSTU (cantada a sa moda ceraxina)
Babbu Nostu chi ses in is Celus siat Santificau su nomini Tu, bengat a nosu su regnu Tu, siat fatta sa voluntadi Tua comente in su Celu aici in sa terra.Su pani nostu po dogna dì donanossi dd'hoi,e perdonasi is peccaus nostus comente nosaterus ddus perdonaus a is depidoris nostus. No si lessis arrui'in sa tentazioni ma liberanosi de mali, aici siat.
A sighiri si cantat:
AVE MARIA (cantada a sa moda ceraxina).
Si cantat po dexi bortas.
Deus ti salvit MARIA prena de grazias, su Segnori est cun Tegus, beneditta ses Tui intre totu is feminas e beneditt'est su frutt'e is intragnas Tuas Gesus. Santa Maria Mamma de Deus pregai po nosaterus peccadoris, immoi e in s'ora de sa morti nosta. (Amen Gesus)
A sa fini de s'arresu de dogna posta si cantat:
Sia Gloria a su Babbu, a su Fillu, i a su Spiridu Santu,
commenti fiat in principiu immoi e sempiri e in is seculus de is seculus. AMEN
A sa fini de s'arresu de su Santu Rosariu si proclama s'ha OFFERESSIMENTU.
CONCLUSIONE
In nomini de su Babbu, de su Fillu e de su Spiritu Santu.
A pustis si arresada su SALVE REGINA o si cantat DEUS TI SALVET Maria.
MISTERIUS GAUDIOSUS
( de arresai su Lunis e su Sabudu)
In su primu misteriu Gaudiosu si cuntemplat coment'a Maria Santissima est istetiu annunziati de s'Arcangelu Gabrieli chi Issa depiat essiri Mamma de Gesù Cristu Signori Nostu.
In su segundu Misteriu Gaudiosu si cuntemplat comenti sa Virgini Santissima haendi intendiu chi S. Elisabetta fiat accanta di essiri mamma, fiat andada subitu a dda visitai, stendi cun issa tres mesis.
In su terzu Misteriu Gaudiosu si cuntemplat comenti sa Virgini Maria hiat donau a sa luci in sa cittadi de Bettlemmi,faci a mesunotti, su Redentori nostu ind'una stadda, e dd'hiat depostu in su presepiu.
In su cuartu Misteriu Gaudiosu si cuntemplat comenti sa Virgini Santissima hiat presentau Gesù Cristu Signori nostu a su tempiu, e dd'hiat postu in is brazzus de su becciu profeta Simeoni.
In su cuintu Misteriu Gaudiosu si cuntemplat comenti sa Virgini Santissima hiat perdiu su Divinu Fillu suu, e pustis dd'hai circau po tres dis, a sa fini de sa terza dì dd'hiat attobiau in su tempiu in mesu de is Dottoris, essendi Issu in edadi de doxi annus.
OFFERESSIMENTU
(Misterius Gaudiosus,s'arresat a pustis de is cincu postas)
Virgini Santissima Mamma de Deus e Signora nosta, nosaterus os'offereus custa prima parti de su SANTU ROSARIU bostu po s'ineffabili cuntentesa chi hestis provati a s'annunziu chi su Verbu Divino depiat abbasciai de s'artu de is celus in su purissimu sinu bostu, e chi cunservendi su candidu lillu de sa puridadi bosta, festis stetia sublimada a sa grandu dignidadi de Mamma de Deus. Po custu hoi nosaterus cungregaus in custa Santa Cunfraria po sa devozioni de su SANTU ROSARIU,elevaus is corus nostus in sa pregadoria a Bosu dedicada, po chi totus pozzant otteniri soddisfazioni de is disigius insoru. Faei, Bosu chi seis Reina de is Celus e Signora nosta chi pozzaus moltiplicai is devotus bostus e chi pozzaus sempiri provai in is corus nostus sentimentus de grazia po custa sagrada devozioni po podi' aici consighiri sa Gloria Eterna. Aici siat.
MISTERIUS DOLOROSUS
( de arresai su Martis e sa Cenabara)
In su primu Misteru Dolorosu si cuntemplat comenti Gesù Cristu Signori nostu fendi is orazionis in s'ortu de Getsemani, hiat sudau sanguni.
In su segundu Misteriu Dolorosu si si cuntemplat comenti Gesù Cristu Signori nostu fiat istetiu accapiau a sa colunna e cruelmenti flagellau cun s'acciottu.
In su terzu Misteriu Dolorosu si cuntemplat comenti Gesù Cristu Signori nostu po sbregungimentu, est istetiu coronau de pungentissimas ispinas.
In su cuartu Misteriu Dolorosu si cuntemplat comenti Gesù Cristu Signori nostu est istetiu cundennau a morti, e po prus bregungia e dolori dd'est istetia posta in coddus sa linna de sa Gruxi.
In su cuintu Misteriu Dolorosu si cuntemplat comenti Gesù Cristu Signori nostu est istetiu crucifissau in su Monti Calvariu, essendi presenti affliggia sa Santissima Mamma Sua.
Offeressimentu
(Misterius Dolorosus, s 'arresat a pustis de is cincu postas)
Virgini addolorada, rifugiu de is abbandonaus e de is peccadoris, cunfortu de is affliggius, nosaterus 'os' offereus custa segunda parti de su Santu Rosariu bostu po cuddus affannus e doloris chi hestis provau in sa vida mortali: Passioni e morti de su Divinu Fillu bostu Gesù Signori nostu. Nosaterus cungregaus in custa Santa Cunfraria, animaus de sincera contrizioni po is peccaus nostus, partecipaus a is doloris bostus, e po s'amabilissimu Coru bostu tanti affliggiu, si supplicaus a nos impetrai su perdonu de is culpas nostas, po chi in grazia pozzaus consighiri sa Gloria eterna. Aici siat.
Misterius Gloriosus
(de arresai su Mercuris e su Dominigu)
In su primu Misteriu Gloriosu si cuntemplat comenti Gesù Cristu Signori nostu sa terza dì a pustis de sa morti sua, fiat resuscitau gloriosu e triunfanti po no morriri mai prus.
In su segundu Misteriu Gloriosu si cuntemplat comenti coranta dis a pustis de sa resurrezioni sua, Gesù Cristu Signori nostu est arziau a is Celus cun mirabili festa e triunfu, biendiddu sa Mamma Sua Santissima cun totus is discipulus suus.
In su terzu Misteriu Gloriosu si cuntemplat comenti Gesù Cristu Signori nostu sezendi a sa deretta de su Babbu suu, hiat mandau su Spiridu Santu in su Cenaculu, aundi fiant is Apostulus suus cungregaus cun sa Virgini Maria.
In su cuartu Misteriu Gloriosu si cuntemplat comenti Maria Santissima est istetia assunta de is Angelus a su celu.
In su cuintu Misteriu Gloriosu si cuntemplat comenti Maria Santissima est istetia coronada de su Divinu Fillu suu Reina de su celu e de sa terra e si cuntemplat ancora sa gloria de totus is Santus.
OFFERESSIMENTU)
(Misteriu Gloriosus, s'arresat a pusti de is cincu postas)
Virgini Gloriosa,Reina de is Celus e Signora nosta, nosaterus os'offereus s'arresu de custa terza parti de su SANTU ROSARIU po s'inneffabili allirghia ch'hestis provau, candu a sa deretta de su benedittu Fillu 'Ostu seis istetia proclamada Reina de is Celus e Abogada de is peccadoris.
Nosaterus s'allirgaus o Signora,de sa gloria e cuntentesa 'osta e si supplicaus de impetrai grazias de su Divini Fillu 'ostu Gesus po s'esaltazioni de sa nosta Santa fidi cattolica, po sa saludi spirituali e corporali de is maladius e de nosus chi serbidoris bostus,seus cungregaus in Cunfraria po sa devozioni de su SANTU ROSARIU.
Moltiplicai o virgini Gloriosa is devotus bostus, e faei chi proveus in is corus nostus sentimentus de grazia po custa Santa devozioni.
Succurreisi o Soberana in totus is perigulus e abisongius, aggiudicaisi a otteniri su perdonu de is peccaus e sa perseveranzia in custa Sagrada devozioni, po chi fidelis in su SANTU serviziu Bostu pozzaus in grazia consighiri sa Gloria eterna. Aici siat.
MISTERIUS LUMINOSUS
(de arresai sa Giobia)
In su primu Misteriu Luminosu si cuntemplat su Battisimu de Gesus Cristu Signori nostu candu fiat intrau in is acuas de su Giordau i essendisi abertas is airis de su celu si fiat intendia sa boxi de su Babbu chi ddu proclamada "Fillu stimau", in su cali "Issu si fiat cumpraxiu".
In su segundu Misteriu Luminosu si cuntemplat comente Gesus Cristu Signori nostu in su sposoriu de Cana, pustis chi sa Mamma Sua si dd'hiat pèdiu, hiat tramudau s'acua in binu, cuss'est istetiu su primu miraculu ch'hiat cumpriu mentras hiat biviu in mes'e sa genti.
In su terzu Misteriu Luminosu si cuntemplat consente Gesus Cristu Signori nostu hiat annunziau sa benida de su Regnu de Deus e cumbidendi totus a sa cunversioni, hiat affirmau chi ingunis hiat essiri intrau vetti chini s'hiat essiri fattu "Piticu" comente unu pipiu.
In su cuartu Misteriu Luminosu si cuntemplat comente in su Monti Tabor sa gloria de sa Divinidadi, hiat risplendiu in sa cara de Gesus Cristu Signori nostu, chi si fiat fattu biri de is discipulus suus in cumpangia de Mosè e di Elia: custa est stetia sa Trasfigurazioni.
In su cuintu Misteriu Luminosu si cuntemplat comente intre e mes"e s'Urtima Cena, pustis hai samunau is peis a is disciplina suus,Gesus Cristu Signori nostu, ddis hiat offertu su pani e su binu, affirmendi chi cussus fiant su corpus e su sanguni suu.
Offeressimentu
(Misterius Luminosus, s'arresat a pustis de is cincu postas)
Virgini Santissima Luminosa Mamma de Gesus e Signora nosta, nosaterus offereus misericordia bosta s'arresu de cust'urtima parti de
su Santu Rosariu po s'innefabili gosu ch'Hestis provau candu su Divinu Fillu Bostu est istetiu proclamau "Fillu stimau" de su Deus Onnipotenti, pedei cun coro de mamma sa remissioni de is peccaus nostus a su Divinu Fillu 'ostu po chi cun sa cunversioni nosta pozzaus torrai a essiri piticus po si podi' incarai in sa port"e su celu gosendi de sa Divina bisioni. Cun fidi ingenugaus anant"e sa
presenzia Bosta, disigiaus vetti chi s'amori chi hoi portaus in is corus nostus po sa devozioni Bosta, s'ammannit de di in di po su tempus chi s'abbarrat de bivi. Nosatrus cungregaus in custa Santa Cunfraria pedeus vetti chi si doneis sa saludi de su corpus e de su spiritu, ammanniendisi sa Santa Fidi e su privilegiu di essiri in eternu serbidoris bostus po consighiri in santidadi sa Gloria eterna. Aici siat.
Salve Regina
Deus osi salvit, Reina
Mamma de misericordia;
vida, dulzura e speranza nosta,
Deus osi salvit.
A bosu ricurreus nosaterus fillus di Eva. A bosu sospiraus gemendi e plangendi in custa
valli de lagrimas.
Bosu duncas, O Abogada nosta, castianosi cun
ogus de misericordia,
i a pustis de custu esiliu,
mostranoisi Gesus
fruttu benedittu de su sinu bostu,
o clementi, o pia, o dulci Virgini Maria.
Deus ti salvet Maria
Deus ti salvet, Maria
chi ses de gratzias piena, de gratzias ses sa vena
e-i sa currente.
Su Deus onnipotente
cun tegus est istadu
pro chi t'hat preservadu
immaculada.
Beneitta e laudada
subra tottu gloriosa:
mama, fiza e isposa
de su Segnore.
Beneittu su fiore
ch'est fruttu de su sinu,
Gesus, fiore divinu,
Segnore nostru.
Pregade a Fizu 'ostru
pro nois peccadores:
chi tottu sos errores
nos perdonet.
E-i sa gratzia nos donet
in vida e in sa morte
e-i sa diciosa sorte
in Paradisu.
Po arregordai is mortus nostus cun sa
pregadoria a issus dedicada:
S'eternu riposu dona a issus Signori, risplendat a issus sa luxi eterna, arreposint in paxi. Amen Gesus.
Confraternita della Vergine Santissima del Rosario
Chiesa di San Giuliano
-Selargius-
