ARREGODUS DE I-SCOLA

ARREGODUS DE I-SCOLA
Is primas dis andaa, eia, a i-scola cumenti de is
atrus pipius, perou fia tristu; m'arregodu ca
pentzaa a s' asillu e nc' iap' essiri bòfiu torrai a
innia puita ca mi pariat ca non fia ainci mannu
de pòdiri andari a i-scola. In cussas dis medas
pipius prangiant puita is mamas si ndi fiant
andadas e issus boliant sodigai. Deu puru tenia
gana de prangiri perou non bolia chi is atrus
m' essant biu puita mi ndi pariat bregùngia. Sa
prima cosa chi mi fut bennia a conca fut ca, a
pustis de una pariga de dis, iap' essiri pòtziu
andai a segunda cun fradi miu. Custu mi
contzolat pagu pagu.
Non m' arregodu, giustu giustu, sa prima dìri de i-
scola, ma m' arregodu ca m' intendia importanti
meda puita, gei fut ora, podia andari a i-scola.
Intraa in d' unu mundu nou, incumentzaa a biviri
una parti importanti meda de sa vida mia: iap' ai
imparau cosas noas e fatu amighentzias noas.
Una borta, candu fia in prima, ia cicau de mi fuiri
puita ca non ddu' iat, in i-scola, cosa peruna chi
m' essat pràxia. M' arregodu ca is possibilidais
mias de i-scriri in corsivu mi faiant intendi
drivessa de is cumpàngius mius. M 'iant postu
sa maistra de sustènniu, chini scit e puita?
Is cosas chi mi passant in conca imoi funt
medas. M'arregodu de Brunella, una cumpàngia
mia: candu sa maìstra dda castiàt incarrèrat a
prangiri meda e deu pentzaa : "Sa prima nò est
lègia e ddi fait fintzas e cara bella. E tandus
puita est prangendi?"
E tzìa Nanna? Non mi nd' ap' a i-scàresciri mai.
Beniat a i-scola pò si contai contus in sardu. Su
prus bèllu fut cussu de pròcu e de su molenti.
Candu tzia Nanna contat is contus mi pariat de
biri totu is scenas.
De su prim' annu passau in is-i-scolas
elementaris m' arregodu pagu. Su chi m' est
abarrau in conca est ca fia sempri cìtia, timia a
is maistrus e fueddàa feti cun is cumpàngius.
Mi depia pònniri is ochiallis e, m' arregodu ca, sa
prima dìri chi ddus portàa, non bolia intrai a i-
scola puita timia chi m' essant pigau in giru.
Difati is cumpàngius m' iant nau inderetura:
"Quattrocchi," e deu iap' ai bòfiu prangi.
Che is cumpàngius mius non nci nd' at atrus: po
cussu totu is arregodus de i-scola funt bellus
meda. Non mi nd' apa mai a i-scàresciri de Giò
chi imoi est in Sassari, in sa scola de is surdus.
Issu fiat un' amigu in su seriu e cun issu
m' agatàa beni meda. Nci arrennescia a
chistionai mellus cun issu che cun is atrus. Ia a
bolli chi issu essat torrau in classi cun nosu!
In classi nci at cancunu piciocheddu chi perdit
cun facilidadi su controllu, perou si fait spassiai
puru. Manuel est unu de i-cussus. Una dìri,
candu fiaus in tertza, si fiat inchietau puita ca, in
sa festa de carnovalli, Michela , chi segundu
issu est sa picioca sua, fiat baddendi cun Luca.
Gei si ndi fiat prexadeddu!! Si ndi fut pesau de i-
scatu e iat pigau a Luca a su tzugu e iat
incumentzau a ddu scùdiri. Cuddu ddu castiàt
spantau. Mancu mali ca sa maìstra si fut posta
in mesu e ddus iat scrobaus!!!
95
In Bolotona fia meda agoa in su programa, po
cussu, candu seu arribàda a Gergei no i-sciia
nudda in cunfrontu a is cumpàngius nous.
M'arregodu ca candu sa maìstra mi pigàt a una
parti po m' imparai is cosas chi no i-sciia, deu mi
intèndia pagu cosa. Perou cicàa de i-studiai
meda, incoragiada de is maìstrus, po nd'
insighiri is cumpàngius e èssiri uguali a issus.
Candu fia in prima sa maìstra mi pigàt sempri in
coa puita deu prangia meda; non bolia benniri a
i-scola e bolia abarrai cun mama.
Candu fiaus in segunda fatziaus partidas de
palloni cun is pìpius de prima e cun cussus de
tertza. Cun is de sa prima binciàus sempri,
invecias cun is de tertza pagus bortas. Una
borta, in sa scuadra, iaus postu is fèminas puru;
Roberta ca fiat sa prus arta de sa classi, si fut
posta in porta e is atras in panchina.
Non mi nd’ ap' a iscarèsciri mai candu fèstaa is
annus in i-scola: "ta bellu chi fiat!". M' arregodu
ca, candu is cumpàngius mi cantànt sa
cantzonedda fia ainci cumòvia chi mi pigàt
s' arrisu.
Chi pentzu a sa prima dìri de i-scola… "Ta tonta
chi fia!..." M' iap' èssiri bòfia setzi a su costau de
una cumpangedda de s'asìllu, perou tocàt a ddu
pregontai a is maìstrus e custu fiat difícili meda
puita ca mi ndi pariat bregùngia. Poi m' ia fatu
coràgiu e fia andàda anch' è issus: su coru
pariat bessendumindi, ma totu fiat andau beni:
is maìstrus non mi nd’ iant papau e deu mi fia
sètzia a su costau de s' amighixedda mia.
Seu sigura ca, candu ap' essìri manna, medas
atrus arregodus chinimoi non mi passant in
conca, s’ant a torrai a presentai puita ca is
annus passaus in sa scola elementari funt
stetius bellus meda.
(Cristian, Alessandro, Maria, Emanuela, Sonia, Michela, Alessia, Stefania, Cristian, Manuel, Michela ).
96

97