SU MOLENTI E SU PROCU

@Adelaide

Published in 

Imparausu Su Sardu

 · 3 weeks ago

SU MOLENTI E SU PROCU

Custu fut unu molenti e unu procu chi teniant sa

lollixedda acanta acanta. In susu fut totu a unu,

in bàsciu fut stallada cun d’ una tella: po èssiri

su procu a parti e su molenti a parti.

Su procu fut sempri prexau ca papat cosa bona:

cixiri, faa…

Su molenti, scedau, ddi dònant unu puniu de

palla e ddi tocat a papai palla e fut sempri

molendi in sa mola. Su procu, dònnia diri, candu

su molenti ndi bessiat de sa mola, ddi narat:

— Castia, tui totu sa dì molendi e ti dònant unu

puniu de palla, candu ti ndi dònant! Candu non ti

ndi dònant non papas mancu palla, e deu, totu

sa dì chentza de fai nudda: a faa, cixiri; acuau a

ora e totu! Sa cosa àndat mali po tui!

— Eh! Ita bolis fai! Ita bolis fai! — ddi narat su

molenti.

Una dìri, a su chitzi, sa meri fut andada a ndi

pigai su molenti po ddu intromissiri in sa mola.

E candu nc'iat ghetau su trigu a su maiolu, dd'

iat nau:

— Còida, ddè, còida! Ca custu est su pani po

bociri su procu.

Candu, a su noti, sa meri ndi dd' ìat bogau de sa

mola e nci dd' ìat torrau a sa lolla, dd' iat nau a

su procu:

__ O su procu, ddu scis una cosa chi m' at nau

sa meri, oi ?

— E Ita t' at nau ?

— At nau: “Còida ddè, còida! Ca custu est su

pani po bociri su procu”. Si bit ca a tui ti depint

bociri!

— Eh! Ca no at essi!

— Ei ei! M’ at nau de aìnci!

Pàssat una pariga de dis e, a mengianu, totu sa

genti àndant a cassai su procu po ddu bociri.

— Gi apu fatu vida mala, ma a tui ca as fatu vida

bona ti depint bociri! — Dd' ìat nau su molenti.

E iat imbucau a currinai prexau.

De "Is contus de Tzia Nanna"

104

Su molenti e su procu

Po cumprendiri su testu

Arrespundi a is pregontas.

1. Ita papat su procu?


2. Ita treballu faiat su molenti?


3. Puita su procu fut sempri prexau?


4. De chini chistionat su contu?


5. Ita teniant, impari, su molenti e su procu?


6. Ita ddi nàrat, dònnia dìri, su procu a su molenti?


7. Cumenti fut sa lollixedda de su procu e de su molenti?


8. Ita papat su molenti?


9. Candu (in s’atòngiu, in beranu, in s’ istadi, in s’ ierru) at essi sussédiu su chi est nau in su contu?


10. Puita?


11. Sa meri a innui nc' iat ghetau su trigu?


12. Puita sa meri ddi nàrat, a su molenti: “Cóida dde’, cóida! Ca custu est su pani po bociri su procu”?


13. Puita ddu depiànt bociri a su procu?


14. Candu, su molenti, iat imbucau a currinai prexau?


15. Segundu tui, su chi est nau in su contu, est sussédiu de ora o de pagu?


16. Puita?


17. Cumbénit a fai vida bona o vida mala?


18. Puita?

105