FEMINAS ANTIGAS
Cun is amigas mias a picciocchedda
Poniaus in fattu in feminas antzianas,
Si praxiant ca fiant beffianas
Ma cancuna portat sa pettiedda !
' Nc ' indi fiat una accanta in bixinau
Chi raccontat ca fiat bella e pretziosa,
Ma propriu sa di chi s'è fatta a isposa
Su piccioccu e' partiu a fai su sordau !
Un' atra narat : Candu 'eniat beranu
Is piccioccus fadian sa serenada
E a sa ventana issa s' affaciada
E saludat gioiosa cun sa manu.
Calincuna fadiat s' ogu pigau,
Fiat sa mexina antiga preferida
E cun is cartas ti liggiat sa vida,
Ti ogat a pillu fintzas su peccau !
Cantu fian togas cussas femineddas !
' nc' impapinanta cu' is contus antigus
De spiritus malignus e aremigus
Po fai a timi a nosu piccioccheddas !
Ma in di 'e festa fadianta spassiai
A ddas bi' brinchendi a ballu sardu,
Ca fiat felicidadi in dogna sguardu !
Fadiat prexeri a s ddas castiai !
È bellu a regordai is tempus antigus
Candu si divertiaus fora 'e mabesa
E is antzianus trattiaus cun gentilesa ;
' nci fiat stima e tottus fiaus amigus !
Vitalia Puxeddu
